忙碌咗幾日出聖誕節既餐單同 Poster，仲要北上去銀行做返個身份認証，實在累得很很很很... 返到嚟香港都已經十點半有多了，搭皇崗直通巴士就喺觀塘油站附近落車，行返上去宜安街搵食。近年來實在有好多食肆係呢條街開張同結業，有好多間店鋪都未試過原本想試吓細細間既壽司店，不過見佢十一點就關門不打擾了！呢條短街有 3 間原本喺觀塘其他地方食蛇羮既店鋪搬咗入嚟，咁凍既天氣加個糯米飯真係好吸引。不過朋友仔話想試下越泰豐，順得人意既我就奉陪了。
坐低無耐老闆就熱情招待，擺低餐牌就講咗句＂你可以自己睇吓先，諗唔到可以介紹比你！＂小小店鋪有招呼，無壓迫實在是好態度。同好多泰國菜一樣，店內有好多食物相片，其中一張係店內廚師比賽得奬相片。好快兩個人就點了個越式軟殼蟹米紙捲、生蝦、海南雞飯、細冬蔭公湯、同埋一枝泰國啤酒！老闆話米紙捲係新菜式就試試吧。
泰式生蝦不論蝦同醬都係比較普通既，不過勝在材料新鮮，$88 蚊有 9隻價錢合理。冬蔭公湯好 Creamy 重椰汁但又唔會摭咗香料既味道，雖然得一隻大蝦分開兩半，但唔似出面用死蝦或者煲到蝦肉梅哂，$68 應該一試。海南雞飯係比較失色的一樣，雞肉煮得過火了，而雞醬亦無乜特別。最期待既米紙捲係最尾上場，放落枱經已好得體；我同朋友都好快一人一件放入口咬，呢道菜好特別值得推介，有西式沙律菜牛油果芒果同新鮮蔬菜、泰式香葉、日式紫薑、仲有越式花生同米紙；有食咗一半先發覺，明明係軟殼蟹卷點解無咗主菜呢？！舉起手叫老闆嚟問吓，老闆即刻好唔好意思咁叫我地放低食緊剩小小果件卷，換過新一碟比我地，原來係廚房漏放了；不過老闆都同我地講咗好多次唔好意思，搞到我地都唔係幾好意思呢！！
經歷小小波折，呢一餐都食到我地兩個飽飽，埋單都係 $354 各位喺觀塘路過既朋友仔都不妨行去呢間鋪頭試吓喔！
沒有留言:
張貼留言